ડોમિનિકાની સરકારે એક અખબારી યાદી બહાર પાડીને જણાવ્યું હતું કે આગામી ઈન્ડિયા-કેરીકોમ કોન્ફરન્સ દરમિયાન વડાપ્રધાન મોદીને આ સન્માનથી નવાજવામાં આવશે.
ડોમિનિકા સરકારે ભારતના વડાપ્રધાન નરેન્દ્ર મોદીને તેના સર્વોચ્ચ નાગરિક સન્માનથી સન્માનિત કરવાનો નિર્ણય લીધો છે. ડોમિનિકાની સરકારે એક અખબારી યાદી બહાર પાડીને જણાવ્યું હતું કે ગયાનામાં યોજાનારી આગામી ભારત-કેરીકોમ કોન્ફરન્સ દરમિયાન વડાપ્રધાન મોદીને આ સન્માનથી સન્માનિત કરવામાં આવશે.
કોરોના મહામારી વખતે ભારતે ડોમિનિકાને કરી હતી મદદ
ડોમિનિકા સરકારના નિવેદનમાં કહેવામાં આવ્યું છે કે ડોમિનિકાના રાષ્ટ્રપતિ સિલ્વેની બર્ટન વડાપ્રધાન મોદીને આ સન્માનથી સન્માનિત કરશે. ફેબ્રુઆરી 2021 માં, વડા પ્રધાન મોદીએ ડોમિનિકાને એસ્ટ્રાઝેનેકા વેક્સિનના 70 હજાર ડોઝની મૂલ્યવાન ભેટ આપી હતી. તેમજ પીએમ મોદીના નેતૃત્વમાં ભારતે ડોમિનિકાને સ્વાસ્થ્ય, શિક્ષણ અને આઈટી ક્ષેત્રે પણ ઘણી મદદ કરી છે. વડા પ્રધાન મોદીની આ ઉદારતાને લઈને ડોમિનિકાની સરકારે તેમને પોતાના સર્વોચ્ચ નાગરિક સન્માનથી સન્માનિત કરવાનો નિર્ણય લીધો છે.
ડોમિનિકાના વડા પ્રધાન રૂઝવેલ્ટ સ્કર્મિટે જેમણે વૈશ્વિક સ્વાસ્થ્ય સંકટ દરમિયાન ડોમિનિકાના લોકોની મદદ કરી હતી એવા વડા પ્રધાન મોદીને તેમના દેશના સાચા મિત્ર ગણાવ્યા. ઈન્ડિયા CARICOM સમિટ 19 નવેમ્બરથી 21 નવેમ્બર 2024 દરમિયાન જ્યોર્જટાઉન, ગયાનામાં યોજાશે.
વડાપ્રધાન મોદીને ઘણા દેશોના સર્વોચ્ચ સન્માનથી નવાજવામાં આવ્યા છે
ઘણા દેશોએ વડાપ્રધાન નરેન્દ્ર મોદીને તેમના સર્વોચ્ચ નાગરિક સન્માનથી સન્માનિત કર્યા છે. ગયા જુલાઈમાં જ રશિયાના રાષ્ટ્રપતિ વ્લાદિમીર પુતિને વડાપ્રધાન મોદીને તેમના દેશના સર્વોચ્ચ નાગરિક સન્માન ‘ઓર્ડર ઓફ સેન્ટ એન્ડ્ર્યુ ધ એપોસ્ટલ’થી સન્માનિત કર્યા હતા. આ પહેલા પીએમ મોદીને ભૂટાનના સર્વોચ્ચ નાગરિક સન્માન ઓર્ડર ઓફ ડ્રુક ગ્યાલ્પોથી પણ નવાજવામાં આવ્યા હતા. ઉલ્લેખનીય છે કે ભૂટાને પહેલીવાર કોઈ બિન-ભૂતાન વ્યક્તિને આ સન્માન આપ્યું છે. વડા પ્રધાન નરેન્દ્ર મોદીને સંયુક્ત આરબ અમીરાત, અફઘાનિસ્તાન, બહેરીન, સાઉદી અરેબિયા, ફ્રાન્સ, ઈજિપ્ત, ફિજી, પાપુઆ ન્યુ ગિની, પલાઉ, અમેરિકા, માલદીવ્સ, પેલેસ્ટાઇન જેવા દેશોએ પોતાના સર્વોચ્ચ નાગરિક પુરસ્કારોથી સન્માનિત કર્યા છે.