વિદેશ રાજ્ય મંત્રી પવિત્રા માર્ગેરિટાએ રાજ્યસભામાં જણાવ્યું કે પીએમ મોદીએ (PM Modi) વર્ષ 2022 થી 2024 સુધી કુલ 38 દેશોની મુલાકાત લીધી. 2022માં પીએમની નેપાળ મુલાકાત પર ન્યૂનતમ ખર્ચ 80 લાખ 1 હજાર 483 રૂપિયા હતો અને 2023માં તેમની અમેરિકાની મુલાકાત પર મહત્તમ ખર્ચ 22 કરોડ 89 લાખ 68 હજાર 509 રૂપિયા હતો.
કોંગ્રેસ અધ્યક્ષ ખડગેએ વડાપ્રધાન મોદીના (PM Modi) વિદેશ પ્રવાસનો ખર્ચ પુછ્યો
કોંગ્રેસ અધ્યક્ષ અને રાજ્યસભામાં વિપક્ષના નેતા મલ્લિકાર્જુન ખડગેએ ગુરુવારે ગૃહમાં સરકાર પાસે વડાપ્રધાનના વિદેશ પ્રવાસ પર થયેલા ખર્ચની વિગતો માંગી હતી. ખડગેએ પીએમ મોદીના (PM Modi) છેલ્લા ત્રણ વર્ષમાં વિદેશ પ્રવાસ પર થયેલા ખર્ચનો હિસાબ માંગ્યો હતો. વિદેશ રાજ્ય મંત્રી પવિત્રા માર્ગેરિટાએ રાજ્યસભામાં કોંગ્રેસના નેતાના પ્રશ્નનો લેખિત ઉત્તર આપતા ગૃહમાં 2022થી 2024 દરમિયાન પીએમ મોદીના (PM Modi) વિદેશ પ્રવાસ પર થયેલા ખર્ચની વિગતો આપી હતી.
વિદેશ રાજ્ય મંત્રી પવિત્રા માર્ગેરિટાએ લેખિત ઉત્તરમાં જણાવ્યું કે પીએમ મોદીએ (PM Modi) વર્ષ 2022 થી 2024 સુધી કુલ 38 દેશોની મુલાકાત લીધી હતી. માર્ગેરિટાના જણાવ્યા અનુસાર, છેલ્લા ત્રણ વર્ષમાં 2022માં PMની નેપાળ મુલાકાત પર સૌથી ઓછો ખર્ચ 80 લાખ 1 હજાર 483 રૂપિયા થયો હતો જ્યારે 2023માં પીએમની અમેરિકાની મુલાકાત પર સૌથી વધુ ખર્ચ 22 કરોડ 89 લાખ 68 હજાર 509 રૂપિયા ખર્ચ થયો હતો. આ દરમિયાન તેમણે પૂર્વ વડાપ્રધાન સ્વર્ગસ્થ મનમોહન સિંહના વિદેશ પ્રવાસ પર થયેલા ખર્ચની વિગતો પણ શેર કરી હતી.
અમેરિકામાં 22.89 કરોડ, નેપાળમાં 80 લાખ: છેલ્લા 3 વર્ષમાં પીએમ મોદીના વિદેશ પ્રવાસ થયેલા ખર્ચના આંકડા સંસદમાં રજૂ કર્યા#pmmodi #mallikarjunkharge https://t.co/JqblYqGFd0
— News18Gujarati (@News18Guj) March 20, 2025
2023માં જાપાન પ્રવાસમાં રૂ. 17 કરોડનો ખર્ચ થયો
માર્ગેરિટાએ તેમના લેખિત ઉત્તરમાં કહ્યું, ‘ડેટા અનુસાર જૂન 2023માં પીએમ મોદીની અમેરિકા મુલાકાત પર 22,89,68,509 રૂપિયાનો ખર્ચ થયો હતો, જ્યારે સપ્ટેમ્બર 2024માં અમેરિકાની જ તેમની મુલાકાત પર 15,33,76,348 રૂપિયાનો ખર્ચ થયો હતો. આ રેકોર્ડમાં મે 2022 માં જર્મનીની મુલાકાતથી શરૂ કરીને ડિસેમ્બર 2024 માં કુવૈતની મુલાકાત સાથે 38 થી વધુ વિદેશી પ્રવાસોનો સમાવેશ થાય છે.
જાહેર કરાયેલા ડેટા અનુસાર મે 2023માં વડાપ્રધાન નરેન્દ્ર મોદીની જાપાન મુલાકાત પર 17,19,33,356 રૂપિયા અને મે 2022માં તેમની નેપાળની મુલાકાત પર 80,01,483 રૂપિયાનો ખર્ચ કરવામાં આવ્યો હતો. આ દરમિયાન, વિદેશ રાજ્ય મંત્રીએ 2014 પહેલા અગાઉના વડાપ્રધાનો દ્વારા કરાયેલી વિદેશ યાત્રાઓનો તુલનાત્મક ડેટા પણ આપ્યો હતો.
2011માં PMની અમેરિકા મુલાકાતનો કેટલો ખર્ચ થયો?
વિદેશ રાજ્ય મંત્રી માર્ગેરિટાએ આપેલા પોતાના ઉત્તરમાં કહ્યું કે 2011માં તત્કાલિન વડાપ્રધાન મનમોહન સિંહની અમેરિકા યાત્રા પર 10 કરોડ 74 લાખ 27 હજાર 363 રૂપિયાનો ખર્ચ થયો હતો. વર્ષ 2013માં તેમની રશિયાની મુલાકાત પર 9 કરોડ 95 લાખ 76 હજાર 890 રૂપિયાનો ખર્ચ થયો હતો, વર્ષ 2011માં તેમની ફ્રાંસની મુલાકાત પર 8 કરોડ 33 લાખ 49 હજાર 463 રૂપિયા અને જર્મનીની તેમની મુલાકાત પર 6 કરોડ 2 લાખ 23 હજાર 484 રૂપિયાનો ખર્ચ થયો હતો.