– 2022 માં આવી રહી છે ગુજરાત વિધાનસભાની ચૂંટણી
– ચૂંટણી પહેલા ગુજરાત વિધાનસભાની 182 બેઠકોનો ઇતિહાસ
– આજે સરહદી જિલ્લા કચ્છની ભુજ સીટ વિશે
ભુજ વિધાનસભા મતવિસ્તાર (Bhuj Assembly Constituency)
ભુજ બેઠક કચ્છ લોકસભા અંતર્ગત આવતી સામાન્ય બેઠક છે. ભુજ બેઠકમાં ભુજ શહેર અને ભુજ તાલુકાના પશ્ચિમ-દક્ષિણ વિસ્તારના 92 ગામોનો સમાવેશ થાય છે. ભુજ તાલુકાના બાકીના ગામો અંજાર બેઠકમાં સમાવિષ્ટ છે. ભુજ બેઠકની ઉત્તરે કચ્છનું રણ, પૂર્વમાં કચ્છનું રણ અને અંજાર બેઠક, દક્ષિણમાં અંજાર અને માંડવી બેઠક જ્યારે પશ્ચિમમાં અબડાસા બેઠક આવેલી છે.
ભુજ બેઠકમાં કુલ 2,81,389 મતદારો છે. ભુજ બેઠક 1962ની પહેલી વિધાનસભા ચૂંટણી વખતથી જ અસ્તિત્વમાં આવી હતી.
છેલ્લી 2017ની વિધાનસભા ચૂંટણીમાં ભુજમાંથી ભાજપના ડૉ. નીમાબેન આચાર્ય કોંગ્રેસના આદમ ચાકી સામે 14,022 મતની સરસાઈથી વિજેતા બન્યા હતાં. નીમાબેન હાલ ગુજરાત વિધાનસભાના પહેલાં મહિલા અધ્યક્ષા બન્યા છે. જ્યારે 2021માં યોજાયેલી સ્થાનિક સ્વરાજ્યની ચૂંટણીમાં ભુજ તાલુકા પંચાયતમાં 29માંથી ભાજપને 21 અને કોંગ્રેસને 08 બેઠકો મળી હતી. જ્યારે ભૂજ નગરપાલિકામાં 44માંથી ભાજપને 36 અને કોંગ્રેસને 8 બેઠકો મળી હતી અને 25 બેઠકો ઉપર ઉભી રહેલી આમ આદમી પાર્ટીએ તમામ 25 બેઠકો ઉપર ડિપોઝીટ પણ ગુમાવી હતી.
ભુજ બેઠકનો ઈતિહાસ જોઈએ
વર્ષ વિજેતા પક્ષ સરસાઈ
1962 ગુલાબશંકર અમૃતલાલ સ્વતંત્ર પક્ષ 13903
1967 એમ.એમ. મહેતા. કોંગ્રેસ. 4417
1972 રામજી ઠક્કર કોંગ્રેસ. 13024
1975 કુંદનલાલ ધોળકિયા સંસ્થા કોંગ્રેસ 3701
1980 મોહનલાલ શાહ કોંગ્રેસ. 12086
1985 કુમુદિની પંચોલી કોંગ્રેસ 3357
1990 પુષ્પદાન ગઢવી ભાજપ. 8190
1995 મુકેશ ઝવેરી ભાજપ 5967
1998 મુકેશ ઝવેરી ભાજપ 22119
2002 શિવજીભાઈ આહિર કોંગ્રેસ 2580
2007 વાસણભાઈ આહિર ભાજપ. 21582
2012 નીમાબેન આચાર્ય ભાજપ 8973
2017 નીમાબેન આચાર્ય ભાજપ 14022
ભુજ બેઠક ગુજરાત વિધાનસભા અધ્યક્ષ આપવાનો ઈતિહાસ ધરાવે છે. હાલ, નીમાબેન આચાર્ય અગાઉ 1975માં ચૂંટાયેલા કુંદનલાલ ધોળકિયા પણ બાબુભાઈ જશભાઈ પટેલની સરકારમાં વિધાનસભા અધ્યક્ષ નિમાયા હતાં. ઉપરાંત, આ બેઠક ઉપરથી ચૂંટાયેલા વાસણભાઈ આહિર રાજ્ય સરકારમાં મંત્રી રહી ચૂક્યા છે જ્યારે 1990માં ચૂંટાયેલા પુષ્પદાન ગઢવી 1996 થી 2009 સુધી 4 વાર કચ્છના સાંસદ રહી ચૂક્યા છે.
આમ, કુલ 13 ચૂંટણીઓમાંથી ભુજમાં કોંગ્રેસ 5 વાર + 1 વાર સંસ્થા કોંગ્રેસ, ભાજપ 6 વાર અને સ્વતંત્ર પક્ષ 1 વાર વિજયી થયો છે. છેલ્લી 3 ચૂંટણીઓમાં ભાજપ ભુજમાં લગાતાર જીત્યું છે. જેથી, ભુજ બેઠક ભાજપની સલામત બેઠકોની યાદીમાં આવી શકે.
સોમવારે અંજાર બેઠકનો ઈતિહાસ જોઈશું