- કેન્દ્ર સરકારની કેબિનેટ બેઠકમાં મહત્વના નિર્ણયો લેવાયા
- પીએમ ઈ-બસ સેવાને મંજૂરી આપવામાં આવી
- વિશ્વકર્મા યોજનાને મંજૂરી આપવામાં આવી
મોદી કેબિનેટનો મોટો નિર્ણય
કેન્દ્ર સરકારની કેબિનેટ બેઠકમાં બુધવારે ઘણાં મહત્વના અને દુરગામી નિર્ણયો લેવામાં આવ્યા હતા. કેંદ્રિય કેબિનેટે પીએમ ઈ-બસ સેવા અને વિશ્વકર્મા યોજનાને મંજૂરી આપી છે. 57,613 કરોડની PM ઈ-બસ સેવા અંતર્ગત 10,000 નવી ઈલેક્ટ્રિક બસો ચલાવવામાં આવશે. PM ઈ-બસ સેવા અંતર્ગત બસોની ટ્રાયલ દેશના 100 શહેરોમાં કરવામાં આવશે.
કેંદ્રિય મંત્રી અનુરાગ ઠાકુરે આપી માહિતી
કેન્દ્રીય મંત્રી અનુરાગ ઠાકુરે આ અંગે જણાવ્યુ કે 57,613 કરોડ રૂપિયાની પીએમ ઈ-બસ સેવા યોજનાને મંજૂરી આપવામાં આવી છે. આ 57,613 કરોડ રૂપિયામાંથી 20,000 કરોડ રૂપિયા કેન્દ્ર સરકારનું યોગદાન રહેશે જ્યારે બાકીનું ભંડોળ રાજ્ય સરકારો આપશે. આ યોજનાથી બસ ઓપરેટરોને 10 વર્ષ માટે સહયોગ કરવામાં આવશે. વધુમાં અનુરાગ ઠાકુરે જણાવ્યું કે પીએમ ઈ-બસ સેવા યોજના અંતર્ગત જે બસો ખરીદવામાં આવશે તે પીપીપી મોડલ હેઠળ ખરીદવામાં આવશે. આ યોજના 2037 સુધી ચાલશે. આ માટે બિડિંગ પ્રક્રિયા શરૂ થશે આવી સ્થિતિમાં ખાનગી કંપનીઓને સુવર્ણ તક મળશે. ઠાકુરે જણાવ્યું કે આ યોજના હેઠળ એવા શહેરોને પ્રાથમિકતા આપવામાં આવશે જ્યાં બસ સેવાનું સંગઠિત માળખું નથી. તેનાથી સીધા જ 45,000 થી 55,000 નોકરીઓનું સર્જન થશે.
કેન્દ્રીય કેબિનેટની બેઠકમાં વડાપ્રધાને પીએમ વિશ્વકર્મા યોજનાને પણ મંજૂરી આપી
બુધવારે યોજાયેલી કેન્દ્રીય કેબિનેટની બેઠકમાં વડાપ્રધાને પીએમ વિશ્વકર્મા યોજનાને પણ મંજૂરી આપી હતી. પરંપરાગત કૌશલ્ય ધરાવતા લોકોને આર્થિક મદદ આપવાની આ યોજનાને મંજુરી આવનારા સમયમાં વોકલ ફોર લોકલને પ્રોત્સાહન મળવાની સંભાવના દેખાઈ રહી છે. આ યોજનામાં સુવર્ણ, લુહાર, વાળંદ અને ટેલર વગેરે પરંપરાગત કૌશલ્ય ધરાવતા લોકોનો સમાવેશ થાય છે. પીએમ વિશ્વકર્મા યોજના હેઠળ એક લાખ રૂપિયા સુધીની લોન નિશ્ચિત શરતો હેઠળ આપવામાં આવશે. વિશ્વકર્મા યોજના કારીગરો અને કારીગરોના ઉત્પાદનો અને સેવાઓની ગુણવત્તા સુધારવા, તેમને સુધારવા અને સ્થાનિક અને વૈશ્વિક સ્તરે આ ઉત્પાદનો સુધી લોકોની પહોંચને વિસ્તૃત કરવા પર ધ્યાન કેન્દ્રિત કરવામાં આવશે.
15 ઓગસ્ટે વડાપ્રધાને યોજનાનો ઉલ્લેખ કર્યો હતો
15 ઓગસ્ટના રોજ વડાપ્રધાન નરેન્દ્ર મોદીએ લાલ કિલ્લા પરથી રાષ્ટ્રને સંબોધિત કરતી વખતે કેટલીક યોજનાઓની જાહેરાત કરી હતી. આ જાહેરાતમાં વિશ્વકર્મા યોજનાની પણ જાહેરાત કરવામાં આવી હતી. વડાપ્રધાને કહ્યું હતું કે આવનારા સમયમાં વિશ્વકર્મા જયંતિ પર અમે 13-15 હજાર કરોડ રૂપિયા સાથે દેશને નવી તાકાત આપવા માટે ‘વિશ્વકર્મા યોજના’ શરૂ કરીશું. વડાપ્રધાન નરેંદ્ર મોદીએ કહ્યું હતું કે સરકાર આ યોજના દ્વારા પરંપરાગત કૌશલ્ય ધરાવતા લોકોને મદદરુપ થશે.