44 વર્ષથી બંધ પડેલા આ ગૌરી શંકર મંદિરમાં નંદી, ગણેશ, કાર્તિકેય અને ભગવાન હનુમાનની તૂટેલી મૂર્તિઓ મળી આવી છે. મહાનગર પાલિકાના અધિકારીઓએ મંદિરની સફાઈ કરાવી છે.
સંભલ, વારાણસી અને બુલંદશહર બાદ હવે મુરાદાબાદમાં ગૌરી શંકરનું મંદિર મળી આવ્યું છે જે 44 વર્ષથી બંધ હતું. જ્યારે મહાનગર પાલિકાની ટીમે ગર્ભગૃહનું ખોદકામ કર્યું ત્યારે કાટમાળ નીચે દટાયેલું શિવલિંગ મળ્યું અને તેની સાથે અનેક તૂટેલી મૂર્તિઓ પણ મળી આવી હતી.
ગૌરી-શંકર મંદિર 44 વર્ષથી બંધ હતું
મળતી માહિતી મુજબ 44 વર્ષથી બંધ આ ગૌરી શંકર મંદિરમાં નંદી, ગણેશ, કાર્તિકેય અને ભગવાન હનુમાનની તૂટેલી મૂર્તિઓ મળી આવી છે. મહાનગર પાલિકાના અધિકારીઓએ મંદિરની સફાઈ કરાવી છે. જો કે તેની ઉપર કેવી રીતે કબ્જો કરવામાં આવ્યો તે હજુ સુધી બહાર નથી આવ્યું.
ઘણા વર્ષોથી બંધ હોવાથી મંદિરની સ્થિતિ ખરાબ
ઘણા વર્ષોથી બંધ હોવાને કારણે આ મંદિરની હાલત અત્યંત ખરાબ થઈ ગઈ છે. હવે મંદિરની સફાઈ અને રંગરોગાન કરાવ્યા બાદ ફરી એકવાર મૂર્તિઓની સ્થાપના કરવામાં આવશે અને પૂજા કરી શકાય તેવી સ્થિતિમાં લાવવામાં આવશે. મંદિરના નિરીક્ષણ દરમિયાન જાણવા મળ્યું કે તેના બંને દરવાજા 1980માં કાટમાળથી ઢંકાયેલા હતા. 1980ના રમખાણોમાં પૂજારીની હત્યા થઈ ત્યારથી મંદિર બંધ હોવાનું પણ સામે આવ્યું છે.
પૂજારીના પૌત્રે ડીએમને લેખિત અરજી કરી હતી
અહેવાલો અનુસાર, પૂજારીના પૌત્રે એક અઠવાડિયા પહેલા મુરાદાબાદના ડીએમને એક અરજી કરી હતી અને મંદિરને ફરીથી ખોલવાની વિનંતી કરી હતી. ઉલ્લેખનીય છે કે શિવ ગોરી મંદિરમાં રંગ રોગાનનું કામ શરૂ થઈ ગયું છે. જિલ્લા અધિકારી અનુજ કુમારની સૂચના પર વહીવટીતંત્ર દ્વારા આ મંદિર ખોલવામાં આવ્યું હતું. ગઈકાલે મ્યુનિસિપલ કમિશનરે રિનોવેશન માટે પત્ર આપ્યો હતો. આ પછી પ્રાચીન ગૌરી શંકર મંદિરમાં રંગરોગાનનું કામ ચાલી રહ્યું છે.
ટૂંક સમયમાં મંદિરમાં રંગરોગાનનું કામ પૂર્ણ કરવામાં આવશે
સ્થળ પર પોલીસ ફોર્સ તૈનાત કરવામાં આવી છે. મ્યુનિસિપલ કમિશનર દિવ્યાંશુ પટેલે જણાવ્યું હતું કે, જિલ્લા મેજિસ્ટ્રેટના આદેશ મુજબ બંધ પડેલા ગૌરી શંકર મંદિરને ખુલ્લું મુકવામાં આવ્યું છે અને સફાઈ કરવામાં આવી છે. આ પછી તેના રંગરોગાનનું કામ શરૂ કરવામાં આવ્યું છે. પત્થરો અને ટાઇલ્સની આવશ્યકતા હશે તો તે પૂર્ણ કરવામાં આવશે ત્યાર બાદ સ્થાપના અને ધાર્મિક વિધિઓ પછી, તેને પૂજા માટે જાહેર જનતાને સોંપવામાં આવશે.
24મી નવેમ્બરે સંભલમાં હિંસા થઈ ત્યારથી જ ઉત્તર પ્રદેશના મુસ્લિમ બહુલ વિસ્તારોમાં બંધ મંદિરો ખોલવાની પ્રક્રિયા શરૂ થઈ ગઈ છે. આ સમયગાળા દરમિયાન, સંભલમાં ઘણા મંદિરો અને વાવ મળી આવ્યા છે. વારાણસી અને બુલંદશહર બાદ મુરાદાબાદમાં 44 વર્ષથી બંધ પડેલું મંદિર પણ મળ્યું છે. ઉલ્લેખનીય છે કે સોમવારે યોજાયેલી બેઠક બાદ નિર્ણય લેવામાં આવ્યો હતો કે આ મંદિરનો પણ જીર્ણોદ્ધાર કરવામાં આવશે..