આજે મહારાષ્ટ્ર કોંગ્રેસના કદાવર નેતા મિલિંદ દેવરાએ કોંગ્રેસને તિલાંજલી આપી દીધી જોકે કોંગ્રેસથી છેડો ફાડનારા તેઓ પહેલા નેતા નથી અને કદાચિત છેલ્લા નેતા પણ નથી. છેલ્લા ચાર વર્ષોમાં કોંગ્રેસને તિલાંજલી આપનારા નેતાઓની યાદીમાં ગુલામ નબી આઝાદ, કપિલ સિબ્બલ અને જિતિન પ્રસાદ જેવા મોટા નેતાઓના નામ પણ સામેલ છે.
મિલિંદ દેવરાએ કોંગ્રેસમાંથી રાજીનામું આપ્યા બાદ ભારત જોડો ન્યાય યાત્રા પહેલા પાર્ટીને મોટો ફટકો પડ્યો છે. લોકસભાની ચૂંટણી હવે થોડા મહિનાઓ બાદ જ યોજાવાની ત્યારે કોંગ્રેસ માટે આ એક મોટો ફટકો છે. આવી સ્થિતિમાં સામાન્ય ચૂંટણી પહેલા મિલિંદ દેવરા જેવા મોટા નેતાનું પક્ષ છોડવું કોંગ્રેસને મોટું નુકસાન પહોંચાડી શકે છે. ખાસ વાત એ છે કે મિલિંદ દેવરા કોંગ્રેસ છોડનારા પહેલા નેતા નથી. તાજેતરના ભૂતકાળમાં, મિલિંદ સહિત આ 11 નેતાઓએ પાર્ટી છોડી દીધી છે.
કોણ છે આ 11 નેતાઓ ?
મિલિંદ દેવરા : કોંગ્રેસને ટાટા બાય બાય કરનારા નેતાઓમાં સૌથી લેટેસ્ટ નામ છે મહારાષ્ટ્રના મિલિંદ દેવરા. મિલિંદ દેવરાએ રવિવારે કોંગ્રેસમાંથી રાજીનામું આપવાની જાહેરાત કરી છે. તેણે સોશિયલ મીડિયા પ્લેટફોર્મ X પર પોતાના રાજીનામાની જાહેરાત કરી હતી. મિલિંદ દેવરાએ તાજેતરમાં મુંબઈ દક્ષિણ બેઠક પરથી ચૂંટણી લડવાનો દાવો કરતા ઉદ્ધવ ઠાકરે જૂથ પર નારાજગી વ્યક્ત કરી હતી.
કપિલ સિબ્બલ : આ યાદીમાં બીજા સ્થાને છે કોંગ્રેસના વરિષ્ઠ નેતા અને પૂર્વ કેન્દ્રીય મંત્રી કપિલ સિબ્બલ. કપિલ સિબ્બલે 16 મે 2022ના રોજ કોંગ્રેસમાંથી રાજીનામું આપી દીધું હતું. જોકે તેમણે રાજીનામું આપ્યાના એક સપ્તાહ બાદ આ જાહેરાત કરી હતી. બાદમાં તેમણે સમાજવાદી પાર્ટી તરફથી રાજ્યસભા સાંસદ તરીકે ઉમેદવારી નોંધાવી હતી.
ગુલામનબી આઝાદ : કોંગ્રેસના દિગ્ગજ નેતા ગુલામ નબી આઝાદે 2022માં પાર્ટીમાંથી રાજીનામું આપી દીધું હતું. તે સમયગાળા દરમિયાન પાર્ટી છોડનારા તે સૌથી મોટા નેતાઓમાંના એક હતા. જમ્મુ કાશ્મીરમાં કોંગ્રેસનો ચહેરો ગણાતા ગુલામ નબી આઝાદનું રાજીનામું 2022 માં કોંગ્રેસ પાર્ટીને માટે સૌથી મોટું નુકશાન હતું. ગુલામ નબી આઝાદે કોંગ્રેસથી છેડો ફાડયા બાદ જમ્મુ-કાશ્મીરમાં ડેમોક્રેટિક પ્રોગ્રેસિવ આઝાદ પાર્ટીના નામથી પોતાની પાર્ટી બનાવી છે.
અશ્વિની કુમાર : પાર્ટીના અનુભવી નેતા અશ્વિની કુમાર 2019ની ચૂંટણીમાં હાર બાદ પાર્ટી છોડનારા પ્રથમ નેતાઓમાંના એક હતા. પૂર્વ કેન્દ્રીય મંત્રી અશ્વિની કુમારે પંજાબ ચૂંટણીના થોડા દિવસો પહેલા ફેબ્રુઆરી 2022માં કોંગ્રેસમાંથી રાજીનામું આપી દીધું હતું.
સુનિલ જાખડ : પંજાબ કોંગ્રેસ એકમનું નેતૃત્વ કરી ચુકેલા સુનીલ જાખડે 2022માં પાર્ટી છોડી દીધી. સુનીલ જાખડને તત્કાલિન મુખ્યમંત્રી ચરણજીત સિંહ ચન્નીની ટીકા કરવા બદલ શીર્ષ નેતૃત્વ દ્વારા કારણ બતાવો નોટિસ પાઠવ્યા બાદ તેમણે પાર્ટી છોડી દીધી હતી. કોંગ્રેસ છોડ્યા બાદ તેઓ મે મહિનામાં ભાજપમાં જોડાયા હતા અને જુલાઈમાં તેમને ભાજપ પંજાબ યુનિટના વડા બનાવવામાં આવ્યા હતા.
આરપીએનસિંહ : આરપીએન સિંહ ઉત્તર પ્રદેશની ચૂંટણી પહેલા પાર્ટી છોડનારા સૌથી અગ્રણી નેતા હતા. પૂર્વ કેન્દ્રીય મંત્રી આરપીએન સિંહ જાન્યુઆરી 2022માં કોંગ્રેસ છોડી વાજતે ગાજતે ભાજપમાં જોડાયા હતા. આરપીએન સિંહ પછાત જાતિના એક અગ્રણી નેતા હતા અને પ્રિયંકા ગાંધીની આગેવાની હેઠળના યુપીમાં ચૂંટણી પ્રચારમાંથી બાકાત રખાતા નારાજ હતા. અંતે તેમણે કોંગ્રેસને તિલાંજલી આપી કેસરિયા કર્યા હતા.
જ્યોતિરાદિત્ય સિંધિયા: હાલમાં કેન્દ્રીય મંત્રી રહેલા જ્યોતિરાદિત્ય સિંધિયાએ 2020માં કોંગ્રેસમાંથી રાજીનામું આપ્યું હતું. તેઓ કોંગ્રેસ છોડીને ભાજપમાં જોડાયા હતા. મધ્યપ્રદેશ કોંગ્રેસમાંથી મોટા પાયે નેતાઓ પક્ષપલટો કરીને જ્યોતિરાદિત્ય સિંધિયા સાથે ભાજપમાં જોડાતા કમલનાથ સરકાર તૂટી પડી હતી.
જિતિન પ્રસાદ : ભૂતપૂર્વ કેન્દ્રીય મંત્રી અને જેમને રાહુલ ગાંધીની ખૂબ જ નજીકના નેતા માનવામાં આવતા હતા એવા જિતિન પ્રસાદે 2021માં કોંગ્રેસ છોડી દીધી હતી અને ભાજપમાં પણ જોડાયા હતા. તેઓ યુપીમાં કોંગ્રેસનો ટોચના બ્રાહ્મણ નેતા ગણાતા હતા. જિતિન પ્રસાદે પોતાના નિર્ણયનો બચાવ કરતા કહ્યું હતું કે ભાજપ જ એક માત્ર વાસ્તવિક રાજકીય પક્ષ છે.
અનિલ એન્ટની : કોંગ્રેસના દિગ્ગજ નેતા અને પૂર્વ કેન્દ્રીય મંત્રી એ કે એન્ટોનીના પુત્ર અનિલ એન્ટોની ગયા વર્ષે જાન્યુઆરીમાં પાર્ટી છોડીને ભાજપમાં જોડાયા હતા. અનિલ એન્ટનીએ વડાપ્રધાન નરેન્દ્ર મોદીએ વખાણ કર્યા હતા અને કહ્યું હતું કે તેઓ ભારતને વિકાસના પંથે આગળ ધપાવવા માટે ખૂબ જ સ્પષ્ટ વિઝન ધરાવતા નેતા છે.
હાર્દિક પટેલ : ગુજરાતના પાટીદાર આંદોલનથી નેતા બનેલા હાર્દિક પટેલને રાહુલ ગાંધી 2019માં પાર્ટીમાં લાવ્યા હતા. એ જ હાર્દિક પટેલે રાહુલ ગાંધીથી નારાજ થઈને મે 2022માં કોંગ્રેસ છોડી દીધી હતી. હાર્દિક પટેલે પોતાના રાજીનામામાં લખ્યું કે પાર્ટીના મોટા ભાગના મોટા નેતાઓ તેમના ફોનમાં વ્યસ્ત રહે છે. રાજીનામા બાદ તેઓ ભાજપમાં જોડાયા હતા.
અલ્પેશ ઠાકોર: કોંગ્રેસના પૂર્વ ધારાસભ્ય અલ્પેશ ઠાકોરે જુલાઈ 2019માં રાજ્યસભાની બે બેઠકો માટેની પેટાચૂંટણીમાં પાર્ટીના ઉમેદવાર વિરુદ્ધ મતદાન કર્યા બાદ પાર્ટી છોડી દીધી હતી. થોડા દિવસો પછી, તેઓ ભાજપમાં જોડાયા અને રાધનપુરથી પેટાચૂંટણી માટે મેદાનમાં આવ્યા, પરંતુ તેઓ ચૂંટણી હારી ગયા. જો કે ગયા વર્ષે યોજાયેલી વિધાનસભાની ચૂંટણીમાં તેઓ ગાંધીનગર દક્ષિણમાંથી જીત્યા હતા.