ખ્રિસ્તી પાદરી બજિન્દર સિંહને (Bajinder Singh) આજે બળાત્કારના કેસમાં સજા સંભળાવવામાં આવી છે. મોહાલી જિલ્લા કોર્ટે બજિંદરને (Bajinder Singh) આજીવન કેદની સજા સંભળાવી છે. મોહાલી કોર્ટે 3 દિવસ પહેલા તેને દોષિત જાહેર કર્યો હતો. જે બાદ તેને પટિયાલા જેલમાં મોકલી દેવામાં આવ્યો હતો. કેસમાં પીડિતાના વકીલે કહ્યું કે કોર્ટે સ્પષ્ટ શબ્દોમાં કહ્યું છે કે દોષિતને તેના અંતિમ શ્વાસ સુધી જેલમાં રહેવું પડશે.
આ કેસ 2018માં એક મહિલા દ્વારા જીરકપુર પોલીસ સ્ટેશનમાં નોંધાવવામાં આવેલી ફરિયાદના આધારે નોંધવામાં આવ્યો હતો. ફરિયાદીએ આરોપ લગાવ્યો છે કે પાસ્ટર બજિન્દર સિંહે તેને વિદેશ લઈ જવાના વાયદા સાથે લાલચ આપી અને મોહાલીના સેક્ટર 63 સ્થિત તેના ઘરે તેના પર બળાત્કાર કર્યો અને તેનો વીડિયો પણ બનાવ્યો હતો.
પીડિતાના જણાવ્યા મુજબ, આરોપીએ તેને લાલચ આપી તેના ઘરે લઈ જઈ ત્યાં તેના પર બળાત્કાર ગુજાર્યો હતો. એટલું જ નહીં, આ ઘૃણાસ્પદ કૃત્યનો વિડિયો બનાવ્યો હતો અને તેને ધમકી આપી હતી કે જો તે વિરોધ કરશે તો વીડિયો જાહેર કરી દેવામાં આવશે. કેસની ગંભીરતાને ધ્યાનમાં લઈને કોર્ટે તેની કડક નોંધ લીધી હતી અને આરોપીઓને કડક સજા આપવાનો નિર્ણય કર્યો હતો.
સજા દરમિયાન બજિન્દર સિંહે (Bajinder Singh) કોર્ટમાં નરમાઈની અપીલ કરી હતી. તેણે દલીલ કરી હતી કે તેને નાના બાળકો છે, તેની પત્ની બીમાર છે અને તે શારીરિક રીતે અક્ષમ છે. પરંતુ કોર્ટે આ દલીલોને ફગાવી દીધી હતી અને કહ્યું હતું કે ગુનાની ગંભીરતાને જોતા કોઈ છૂટ આપી શકાય નહીં.
કેસ સંબંધિત અન્ય મહત્વપૂર્ણ મુદ્દાઓ
પીડિતાએ જણાવ્યું કે તેને વિદેશમાં સ્થાયી થવાની ઈચ્છા હતી, જેના કારણે તેણે બજિંદર સિંહનો (Bajinder Singh) સંપર્ક કર્યો. બજિન્દરે આ તકનો લાભ ઉઠાવીને તેને પોતાના ઘરે બોલાવી દુષ્કર્મ આચર્યું હતું.
CCTV ફૂટેજ પરથી ખુલ્યું રહસ્યઃ
પોલીસે ઘટના સંબંધિત પુરાવા એકત્ર કરવા માટે સીસીટીવી ફૂટેજની તપાસ કરી હતી, જેમાં અનેક શંકાસ્પદ ગતિવિધિઓ પ્રકાશમાં આવી. આ પુરાવાના આધારે કોર્ટમાં મજબૂત કેસ રજૂ કરવામાં આવ્યો હતો.
અન્ય આરોપીઓને નિર્દોષ જાહેર કરાયાઃ
આ કેસમાં બજિન્દર સિંઘ (Bajinder Singh) સિવાય અન્ય પાંચ લોકોને પણ આરોપી બનાવવામાં આવ્યા હતા, પરંતુ પુરાવાના અભાવે કોર્ટે તેમને નિર્દોષ જાહેર કર્યા હતા. ટ્રાયલ દરમિયાન એક આરોપીનું મોત પણ થયું હતું.
પીડિત પક્ષે સંતોષ વ્યક્ત કર્યો
પીડિતા અને તેના પરિવારે કોર્ટના આ નિર્ણય પર સંતોષ વ્યક્ત કર્યો અને કહ્યું કે આ ન્યાયની જીત છે. તેમણે કહ્યું કે કેસને નબળો પાડવા માટે તેમના પર દબાણ કરવામાં આવ્યું હતું અને તેમને ખોટા કેસમાં ફસાવવાનો પ્રયાસ કરવામાં આવ્યો હતો. તેમને 5 કરોડની લાંચ આપવાનો પ્રયાસ પણ કરવામાં આવ્યો હતો, પરંતુ તેમણે ન્યાય માટે લડત ચાલુ રાખી હતી.
#WATCH | Chandigarh | Pastor Bajinder Singh sexual assault case victim says, "I want at least 20 years of imprisonment to him. He knows the law very well and does all this crime willingly. I want women to come out and speak freely about him. They should not get scared anymore…"… pic.twitter.com/lqqSllHvVJ
— ANI (@ANI) April 1, 2025
બજિન્દર સિંહ (Bajinder Singh) અન્ય કેસમાં પણ સંડોવાયેલો છે
મારપીટનો મામલો
બજિન્દર સિંહનો એક વીડિયો વાયરલ થયો હતો, જેમાં તે એક મહિલાને થપ્પડ મારતો જોવા મળ્યો હતો. આ વીડિયોના આધારે તેની સામે અલગથી કેસ નોંધવામાં આવ્યો હતો.
જાતીય સતામણીનો કેસઃ
કપૂરથલામાં એક મહિલાએ પુજારી પર તેને અયોગ્ય રીતે સ્પર્શ કરવાનો અને ધમકી આપવાનો આરોપ લગાવ્યો છે. આ મામલાની તપાસ માટે વિશેષ તપાસ ટીમની રચના કરવામાં આવી છે.